VIGAN CITY – Saan a maawat ni Raymond Tabuso ti pannakatay ti ama ken ti inunaan a putotna kalpasan ti pannakakuryentda iti live wire ti extension idiay Brgy. Amguid, Candon City.
Iti pannaki-uman ti Bombo Radyo Vigan ken ni Raymond, arigna saannan a kabaelan ti nakitana a langa ti amana kangrunaan ti anakna ta agtungtunglaben idi asitganna kalpasan ti pannakakuryentda.
Segun ken ni Raymond, nakigtot laengen ta nakitana nga agsasangit ti dadduma pay a kameng ti pamiliana ket impagarupna nga adda ti nagdidinnangran ngem nakitanan nga agpapada a nakaidda ken nakuryente ti amana a ni Rolando Tabuso, agtawen ti pitopulo ket dua; putotna a ni John Reymart, agtawen ti duapulo ket maysa ken asawana a ni Marlyne isu nga insigidada nga inlugan dagiti biktima iti maysa a traktor nga isun ti inaramatna tapno maipanda iti ospital.
Yamanenna ta saanen a naipakaroan pay ti inana a nagarayat met laeng ta ti tangan ti ramay ti imana iti nakuryente ken naipalladaw apaman naibaba iti fuse iti pagtaenganda.
Nupay kasta, maladingitan ti kasasaadda a taga-bambantay ta aniaman nga emergency ket parikotda ti kalsada a pagnaanda ta saan amin a lugan ket makapagna iti nasao a lugar.
Maipalagip a nakuryente idi kalman bayat ti panagbilagna ti lupot a linabaan ni Marlyne ta naiggamanna ti live wire iti extension a naikamang ti balayda idin inarayat isuna ti anakna ken amana a rason ti pannakairamanda a nakuryente ken pannakatayda.
Kabayatanna, pinasingkedan ni Marlyne a saannan nga ammo pay ti napasamak ta apaman ti pannakakuryentena ket naawanen ti puot ngem napalaus ti ladingitna ta dua a kameng ti pamiliada ti natay.
