VIGAN CITY – Tallogasut walopulo ket tallo iti covid-19 cases a nainayon iti probinsia isu nga umaboten iti 9,314 idinto nga uppat iti nainayon a natay isu nga umaboten iti 181 kas maibasar ti listaan iti Ilocos Sur COVID-19 Task Force.
Kaaduan a kaso ket nairekord idiay Bantay a limapulo ket dua, San Ildefonso a tallopulo ket walo, Sinait a tallopulo ket uppat, sag-tallopulo ket tallo iti San Vicente ken Sto. Domingo, ken tallopulo ket maysa iti Vigan.
Manipod met iti duapulo ket pito a kaso iti San Juan ket adda ti maysa a pimmusay, duapulo ket dua a kaso manipod Magsingal a maysa a pimmusay, duapulo ket maysa iti Cabugao, sangapulo ket innem iti Sta. Maria a maysa iti pimmusay, sag-sangapulo ket tallo iti Narvacan, sag-sangapulo ket dua iti Nagbukel ken Suyo, Sta. Catalina a sangapulo ken maysa iti pimmusay, sag-tallo iti Banayoyo, Candon, Cervantes ken San Esteban, dua iti Tagudin ken saggaysa iti Gregorio del Pilar, San Juan, Santiago ken Lidlidda.
Kadagiti nairekord a kaso ket tallo iti reinfection idinto a 2,440 iti aktibo a kaso.
Iti agdama, 6,693 iti total recoveries ta nanayunan ti duapulo ket pito a nalaingan.
