Nakurang duapulon a barangay ti napanan ti COMELEC-Sta. Cruz kas paset iti Automated Counting Machine demo roadshow tapno maisuro ti pannakaaramat dagiti makina kasangwanan iti May 12, 2025 elections.
Iti pannaki-uman ti Bombo Radyo Vigan ken ni Election Officer Elvirita Dandin, ti nasao a bilang ket manipud iti uppat a pulo ket siam a barangay ken dua a pagadalan a kada aldaw ket maysa a barangay ti targetda a malpas.
Nakipaset iti demo roadshow dagiti Barangay and Sangguniang Kabataan officials, senior citizens, ken dadgiti damona ti agbotos.
Nupay ti automated counting machine ket mamitlo a daras ti kapaspasna ngem kadagiti vote counting machine a dati a naar-aramat ket ibalbalakadda latta kadagiti agbotos a sayaaten ti agshade iti botosan a kandidato tapno nasigsigurado.
Ti Comelec roadshow ket narugian idi December 2 ken agpaot agingga January 30, 2025.
