VIGAN CITY – Nakurang a tallo a tolenada a nadumaduma a klase a chicken products a naikarga ti maysa a van iti innala dagiti kameng ti Quarantine Task Force iti quarantine checkpoint idiay Brgy. Bio, Tagudin.
Segun ken ni Provincial Quarantine Officer Martel Quitoriano, saan a nainspeksyon dagiti nasao a produkto van uray nu adda ti naan-anay a dokumento na.
Dagiti innala ti Quarantine Task Force a produkto ket naikarga iti van a minaneho ni Albert Quezon, agtawen ti tallo pulo ket lima nga agnaed idiay San Jose, San Jacinto, Pangasinan ken ti kaduana a ni Arnold Bandarlipe, agtawen ti dua pulo ket dua, naasawaan ken agnaed idiay Brgy. Sitio Nambangan Guibel, San Jacinto iti nasao met laeng a probinsia.
Kabayatanna, nagballaag ni Quitoriano kadagiti nasukir nga aglablabsing iti provincial ordinance a pasyaren danto dagiti amin nga adda iti freezer-na ditoy probinsia ta kitaen da nu kasanu katalged dagiti produkto a mailaklako ditoy probinsiya.
Kadua ti Provincial Quarantine Office iti nasao nga addang ti Provincial Meat Inspection Service nga idaulwan ti Provincial Veterinary Office ken sumagmamano a kameng ti Philippine National Police.
