Nakurang 600 a participant ti nakikaysa iti 5-km. advocacy run a naawagan iti “Tsunami! Run for Safety” iti Vigan City, Ilocos Sur tapno rambakan ti umadani a World Tsunami Awareness Day 2025 inton Nobyembre 5.
Ti aktibidad ket inurnos ti Philippine Institute of Volcanology and Seismology (PHIVOLCS-DOST) ken ti Vigan City Government tapno ital-o ti naan-anay a pannakaammo mainaig iti kinasagana no adda tsunami, nangruna kadagiti coastal communities iti Western Luzon a narisgo gapu iti panaggaraw ti Manila Trench.
Segun iti DOST-PHIVOLCS, ti 5-km run ket agserbi a simulation ti husto a responde no adda pangta ti tsunami.
Kayat pay a palagipan ti ahensia ti publiko ti nasken a panagtaray iti lima a kilometro manipud iti kabaybayan no adda mangngegda a naidumduma nga uni ti kabaybayan wenno panagsanud ti danumna kalpasan ti napigsa a gingined.
