Mabalin nga umabot iti nasurok-kumurang 12,000 a pagadalan ti maapektaran iti iduduprak ti Super Typhoon Uwan iti pagilian segun iti Department of Education Disaster Risk Reduction and Management Service.
Iti naudi a report, posible nga umabot iti 11,968 a pagadalan manipud iti 120 a division ti napeggad iti layus idinto a 12,747 manipud iti 110 a division ti napeggad iti landslide gapu iti napigsa a tudo.
Region 3 ti kaaduan iti pagadalan a mabalin a malayus ta adda 2,936 a bilangna idinto a ti CALABARZON met ti kaaduan iti bilang dagiti pagadalan a naapektaran iti landslide nga umabot iti 2,786.
Nagpalagip ti ahensia iti agtultuloy a pannakikammayet kadagiti lokal a gobierno ken DRRM offices tapno masigurado ti kinasagana iti emergency response ken iactivate ti School Disaster Risk Reduction Management Teams at contigency plan para iti manamnama a layus ken landslide.
