Umabot iti 30 a tattao ti natay manipud Enero 20 agingga Pebrero 3 gapu iti nakaro nga snow idiay Japan.
Karaman kadagiti biktima da Kina Jin, agtawen iti siam a pulo ket maysa, a nasarakan a natay iti sirok ti tallo a metro nga snow iti sango ti pagtaenganna idiay Ajigasawa, Aomori.
Mamati ti kapulisan a natupakan iti snow manipud iti rooftop, idinto a nasarakan iti abayna ti maysa nga aluminum shovel.
Suffocation ti maitudtudo a rason ti pannakatayna.
Gapu iti delikado a kasasaad ket nangipatulod ti gobierno ti Japan iti tropa tapno tulongan dagiti agindeg iti Aomori, rehion a kakaro a naapektaran.
Nagkiddaw ni Aomori Governor Soichiro Miyashita iti tulong manipud kadagiti suldado tapno masuportaran dagiti babbaket ken agkaykaysa nga agyan iti rehion.
