VIGAN CITY – Nakaro a krisis iti pinansial ti mapaspasaran ti intero nga Afghanistan iti agdama gapu ta awan ti siasinoman nga Afghan national ti adda trabahona ita a naagawen dagiti Taliban ti pagilianda.
Iti pannaki-uman ti Bombo Radyo Vigan ken ni Bombo International Correspondent Sayed Sadaat, maysa a construction company accountant idiay Kabul, Afghanistan, adu dagiti nagiikaten nga empleyado ta saan pay la ida a mapaspasueldo dagiti Taliban gapu ti awan a badyetdan iti bangko.
Gapu ti dayta, mapilitan dagiti kaaduan nga Afghan national a pumanaw idiay Afghanistan tapno maliklikan no adda man dagiti civil war a mapasamak manen iti pagilianda.
Malaksid ti dayta, namnamaen ni Sadaat a tungpalen dagiti Taliban ti karida a simpaen no ania dagiti nagbidbiddutanda idi kallabes ken ti panangisublida iti karbengan dagiti babbai tapno makasublida met nga agtrabaho.
Para kenkuana, numan nasyaat ti ideklararto dagiti Taliban a klase ti gobiernoda ket mabalin nga agbati latta isuna idiay Afghanistan ta narigrigat manen ti sitwasyon iti pagilianda no dagiti kas kenkuana nga edukado ket awan ti mabati.
