VIGAN CITY – Impasigurado ni Dr. Trina Tabogga Talaga a nalpasen iti contact tracing kadagiti nakapulapol ti kaunaan a pasyente iti covid-19 UK Variant iti probinsia agingga third degree level.
Iti pannaki-uman iti Bombo Radyo Vigan ken ni Dr. Talaga, iti agdama ket manarimaan iti panag-home quarantine-da ken mamonmonitor iti kasasaad iti salun-atda.
Kagiddan iti dayta ket pagyamanan ti doktora a nagnegatibo amin iti covid-19 dagiti nakapulapol ti UK Variant patient.
Inlawlawagna nga idi naawatda iti pakaammo manipod Department of Health iti UK variant iti probinsia ket nakasubli payen iti trabaho ti pasyente ta nalainganen ken nalpasen iti quarantine-na kalpasan iti panagpositibona iti covid-19.
Nupay kasta ket nakikammayet iti provincial government iti Mayor iti ili ti Sta. Lucia ken Municipal Health officer isu a naisayangkat iti mass testing babaen iti RT-PCR test ken Antigen test idi kalman iti nasao nga ili.
Maipalagip nga impakammo ti provincial government babaen iti panangidaulo ni Governor Ryan Luis Singson idi April 13, 2021 iti panangkumpirmar ti Department of Health iti kaunaan a kaso tii covid UK variant iti Ilocos Sur a ti pasyente ket babai nga agtawen ti limapulo ket walo agnaed idiay Luba, Sta. Lucia, agriculturist nga agtrabtrabaho iti NTA Candon Branch ngem saan a rimuar iti probinsia ngem na-expose iti maysa nga APOR manipod Rosario, La Union babaen iti naisayangakat a taripnong ditoy probinsia a gappuanan iti panagraira iti kaso iti covid-19.
Kabayatanna, pagan-annaden ni Governor Singson dagiti umili kangrunaan dagiti adda iti sagsagabaenda kagiddan iti kaadda ti Covid UK-variant iti probinsia ta kaaduan a pimmusay a pasyente iti covid-19 ket adda iti commorbidity-da ta umaboten iti sangapulo ket maysa a covid-19 related deaths iti probinsia.
