VIGAN CITY – Dead on arrival ti lalaki a nakamotorsiklo ta naidungpar iti maysa a pick-up gapu ta linisyanna ti nagballasiw a lalaki iti National Highway idiay Barangay Parada, Sto. Domingo.
Segun ti Sto. Domingo Municipal Police Station, ti nagmaneho iti Gray Toyota Hilux Pick-up ket ni Travis Severino Navarro, naasawaan, negosyante nga agnaed idiay Brgy. Resurreccion, San Juan; ti driver iti Raider 150 motorcycle ket ni Renie Palileo Mendoza, agtawen ti tallopulo ket walo nga agnaed idiay Panginay, Balagtas, Bulacan kaduana ti asawana a backrider-na a ni Ruby Bernardo Mendoza, agtawen ti tallopulo ket siam; idinto a ti bimmallasiw a lalaki ket ni Adonis Del Mar Patao Oandasan, agtawen ti sangapulo ket siam nga agnaed idiay Brgy. Napo, Magsingal.
Sakbay iti insidente, agpapabagatan a direksyon ti pick-up idinto nga adda iti bangir a linya ti motorsiklo idi nadanonda iti nasao a lugar ket liniklikan ti driver ti motor iti agballasiw a lalaki isu a naipan iti linya iti pick-up a gappuanan ti panagdinnungparda ket naipurwak dagiti nagkalugan ti motor ken naipan iti motor iti nagballasiw a lalaki.
Agpapada a naipan iti Ilocos Sur District Hospital-Magsingal ti driver ken backrider ti motor pakairamanan ti nagballasiw ngem naideklarar a dead on arrival ti driver iti motor; ti back rider-na ket nadundunor isu a naiyakar iti Northside Doctors Hospital, Guimod, Bantay para iti pannakatamingna idinto a nagsagaba iti dunor iti luppo ti lalaki a nagballasiw.
