Nagpanawagan ni house tourism committee vice chairman ken Palawan Representative Gil Acosta ti congressional review iti panagusar dagiti travel tax a nakolekta manipud kadagiti biyahero a Pilipino a mapan iti sabali a pagilian.
Pinasingkedan ni Acosta a masapul nga imbestigaran no kasano a naaramat dagiti nakolekta a travel tax.
Impaganetget pay ti agpampanday linteg nga umabot iti P4 bilyon agingga P5 bilyon kada tawen ti koleksion ti travel tax a pagbingayan ti Tourism Infrastructure and Enterprise Zone Authority (TIEZA), Commission on Higher Education (CHED), ken cultural sector.
Innayon ni Acosta a ti isyu ket agkasapulan ti nainget a koordinasion dagiti ahensia ti gobierno.
Kabayatanna, pending pay laeng iti House Committee on Tourism dagiti sumagmamano a gakat a pakairamanan ti House Bill 7443 nga impila ni House Majority Leader Ferdinand Alexander “Sandro” Marcos a panawagan ti dagus a pannaka-ikkat ti travel tax.
