Inawaten ti Office of the Ombudsman ti referral wenno rekomendasyon ti Independent Commission for Infrastructure (ICI) a mapilaan iti kaso dagiti sumagmamano nga agdama ken dati nga opisyal ti gobierno a maibagbaga a karaman iti maanomalya a flood control project iti gobierno.
Karaman kadagiti nairekomendar a mapilaan iti kaso a kriminal ken administratibo ket da Senator Joel Villanueva, Senator Jinggoy Estrada, dati nga Ako Bicol Party-list Rep. Elizaldy Co, dati a Department of Public Works and Highways (DPWH) Undersecretary Roberto Bernardo, dati a Congresswoman Mary Mitzi Cajayon-Uy, ken Commission on Audit (COA) Commissioner Mario Lipana.
Segun ken ni dati a Supreme Court Justice ken ICI Chairman Andres Reyes a nangidaulo ti panagpila iti rekomendasyon, ti addangda ket gapu iti pannakaawat iti pasuksok iti sumagmamano nga opisyal manipod kadagiti contractor kadagiti proyekto iti gobierno.
Iti imbestigasyonda ket umabot iti duapulo ket lima agingga tallopulo a porsiento iti naawatda a kickback a mabalin a manglabsing ti Article 210-212 iti Revised Penal Code wenno Bribery and Corruption of Public Officers.
Karaman pay ti Section 3 paragraph b ken 3 paragraph c iti Republic Act No. 3019 wenno Anti-Graft and Corrupt Practices Act ken posible a mairaman pay iti kaso a plunder.
Kabayatanna, pinasingkedan ni Ombudsman Jesus Crispin Remulla nga insigida a maisalang ti preliminary investigation ti endorsement iti ICI.
