VIGAN CITY – Agtultuloy iti panangipatungpal ti nainget a social distancing a kas paset iti health and safety protocol kagiddan iti panaglukat iti Christmas village iti ili ti Sta Maria.
Iti pannaki-uman ti Bombo Radyo Vigan ken ni PLt. Joel Dasargo nga OIC iti Sta. Maria Police Station, nupay makitada nga adu iti nasukir iti nasao a pagpasyaran ket isu iti ipangrunada a kitkitaen tapno maipatungpal dagiti pagannurutan tapno maliklikan iti covid-19 pandemic.
Segun ken ni Dasargo, limitado laengen iti sumrek a mapan iti christmas village ta kasapulan nga aglog book-da wenno agaramatda iti safe pass ket kalpasan iti pannakaalada iti ladawan ket saanda a mabalin nga agistambay tapno maikkan iti gundaway dagiti dadduma pay nga umili.
Nanayunan pay dagiti pulis nga agbanbantay iti nasao a lugar a mangkita kadagiti mapan agpasyar tapno awan iti aglbasing iti pagannurutan.
Kabayatanna, pagyamanan ni Dasargo dagiti adda iti Field training Program a Philippine National Police ta dakkel ti tulongda iti panagbantay para iti pannakaliklik iti krimen kagiddan iti panagrugin iti simbang gabi.
