VIGAN CITY – Nainget a maipatpatungpal idiay Pakistan dagiti naduma-duma a precautionary measures tapnu maliklikan iti panagwaras iti nasao a pagilian ti 2019 novel coronavirus- acute respiratory disease a naggapu idiay Wuhan City, China.
Dayta ket iti laksid nga awan pay iti kaso ti nasao a sakit idiay Pakistan a kas kinumpirmaran ni Dr. Rafi Ullah iti pannaki-uman kenkuana ti Bombo Radyo Vigan.
Segun ken ni Dr. Ullah, sakbay a makastrek dagiti tattao idiay airport ti Pakistan, makita a naimbag ti body temperature da babaen ti thermal scanner ket nu makita dagiti airport authorities a nangato iti temperatura ti bagi ti maysa a tao a kasla aggurigor, i-isolate da nga insigida ket dumalan iti naan-anay a quarantine procedure.
Ni Dr. Ullah a maysa a Pakistani national ket nagadal idiay China ken kagapgapu na laeng idiay Shanghai, sumagmamanon nga aldaw iti napalabas isu nga ammo na a nainget dagiti pagannurutan nga ipatpatungpal ti China kadagiti tattao a rumwar iti nasao a pagilian.
