Inaprobaran ti House Committee on Women and Gender Equality ti consolidation dagiti gakat a panggepna a mangipataw iti naing-inget a pannusa iti panaglabsing iti gender-based sexual harassment kadagiti work place ken education wenno training centers.
Ti panggep daytoy a linteg ket tapno mabaliwan ti Safe Spaces Act wenno RA 11313.
Segun ken ni Bataan Rep. Geraldine Roman, chair ti komite, kasapulan ti nadagdagsen a pannusa kadagiti opisial ti gobierno wenno empleado a manglabsing iti linteg.
Dagiti first offender ket mapatawan ti mandatory suspension iti public office iti saan a nasursurok ngem innem a bulan; agmuelta ti P50,000 agingga iti P100,000; ken Mandatory completion ti gender sensitive training program.
Dagiti repeat offenders ket agmuelta ti P100,000 agingga iti P200,000; Mandatory dismissal public office; Disqualification nga agtakem iti public office iti lima a tawen; Permanente a rekord ti panaglabsing; Public apology; ken referral iti oversight body.
Inlawlawag ni Rep. Roman a ti naing-inget a pannusa ket tapno mapatibker ti accountability dagiti adda iti public office.
No maipaulog ti naisingasing a pannakabalbaliw, masapul nga agipaulog ti Department of the Interior and Local Government, Civil Service Commission, ken dadduma pay a maseknan nga ahensia ti gobierno dagiti implementing rules and regulations (IRR) tapno agbalin a pagannurotan ti naamyendaran a linteg.
