Disiplina ti bagi iti nagbalin a tulbek ni Rona Marie Villaflor Ramos a nagturpos manipod Bataan Peninsula State University tapno ag-Rank No. 1 iti April 2025 Licensure Examination for Midwives.
Iti pannaki-uman ti Bombo Radyo Vigan ken ni Ramos, manipod nagadalen iti kolehio ket impasneknan iti nagbasa ket nagbalin a disiplinado iti ar-aramidenna ta ammona a dakkel iti epektona dayta iti masangwanan.
Segun ken ni Ramos, apaman a nagturpos iti kursona a Midwifery ket napalaus iti panag-review na ta intudingna iti walo nga oras a panagbasbasa ken saan pulos a nagliway uray maysa nga aldaw ta kalikagumna nga ag-rank no. 1 iti exam.
Aminado a narigatan iti eksaminasyon ket ti laengen ingkararagna ket tay makapasa ngem saanna nga impagarup a natungpal iti arapaapna nga ag-topnotcher.
Saan nga achiever idi elementarya ni Ramos ngem idi nag-high school ken college ket napalikmutan kadagiti nagaget nga agbasa a kaadalanna isu a naimpluwensyaan ket inggaedna iti nagadal.
Balakadna kadagiti agad-adal nga agbalin a disiplinado iti bagi, maddaan ti time management, arapaap ken kalikagum tapno saan a marigatan ken ti kangrunaan, agkararag iti Namarsua tapno adda iti mangbayabay para iti pannakagun-od kadagiti arpaap.
