VIGAN CITY – Agtultuloy iti imbestigasyon dagiti otoridad inaig iti napasamak nga uram iti Hidden Garden idiay Brgy. Bulala, Vigan City.
Iti pannaki-uman ti Bombo Radyo Vigan ken ni Francis Flores nga akin-kukua iti Hidden Garden, agdudua iti ania iti nagtaudan iti uram ta natalek isuna a naiddepna amin a breakers isunga imposible nga electrical fault iti rasonna.
Segun ken ni Flores, apaman a naamoanna nga adda uram ket nagturong iti nasao a paset isu nga impadasda a dinepdep ngem saanda a nagballigi ta naiddep iti fire hydrants gapu iti panagawan ti suplay iti kuryente isu a nagkayamkam iti uram.
Nupay kasta, nagyaman ni Flores kadagiti kameng ti Bureau of Fire Protection, pannakabagi ti linteg ken dagiti tattao a timmulong tapno madepdep iti apoy ket yamanenna ta awan iti nadangran kadakuada.
Pinasingkedan met ni Brgy. Bulala Captain Rogelio Rabara a narigat iti panangdepdepda iti apoy gapu iti napaspas a panagkayamkamna ta naaramid iti light materials dagiti nauram.
Innayonna a ti kangrunaan a naapektaran ket iti panganan a paset iti hidden garden.
