VIGAN CITY – Maisagsaganan ti kaso a maipila kontra iti maysa nga agtawen-iti-sangapulo ket walo a suspek iti panagtakawan idiay MSC Construction, Barangay Poblacion, Suyo idinto a ti menor de edad a kaduana ket naiturn-over iti Municipal Social Welfare and Development.
Iti pannaki-uman ti Bombo Radyo Vigan ken ni Police Captain Godofredo Ribuyaco, pinaglibakan nga immuna dagiti suspek nga isuda ti nagtakaw ket nagpammarang pay a menor de edad ti maysa kadakuada.
Immuna a pinag-nganga ni Ribuyaco dagiti suspek ket idi makitana nga adda agtubtubo a wisdom tooth ti maysa kadakuada ket isu met ti panagbalawna no pudno ti ibagbagana nga agtawen iti sangapulo ket pito.
Tapno makumpirmaran ti pakabigbigan ti maysa a suspek, nangala dagiti pannakabagi ti linteg iti birth certificate-na ket naduktalan nga agtawen daytoy iti sangapulo ket walo.
Kabayatanna, innayon pay ni Ribuyaco a ti suspek nga agtawen iti sangapulo ket pito ket dati metten nga adda nakairamananna a kaso.
Maipalagip a dagitoy a suspek ket nagtakaw iti dua a piraso ti baterya ti trak a narecover met laeng idiay Sta. Cruz nga isu ti lugar a nangilakoanda.
VIDEO AUDIO OF PCAPT. GODOFREDO RIBUYACO
