VIGAN CITY – Manarimaan ti panangsapul dagiti pannakabagi ti linteg ti suspek a nagtakaw iti Nueva Segovia Consortium of Cooperative ken Metro Vigan Annex Travel & Tours, Barangay 1, Vigan City, Ilocos Sur.
Nakaawat ti report iti Vigan City Police Station manipod ken ni Maricris Rabara, agtawen ti tallopulo ket lima, naasawaan, OIC Branch manager iti NSCC ken ni Rhea Maurie Regua, agtawen ti tallopulo ket dua, Account Executive ABOEX nga adda iti napasamak a panagtakawan iti nasao a lugar.
Iti pannaki-uman ti Bombo Radyo Vigan ken ni PMaj. Franco Catalan a Deputy Chief of Police iti Vigan City Police Station, maibasar ti CCTV footage a naala ket nabigbigda ti suspek a ni Jonel Picore Arellano, addaan ti husto a tawen, baro nga agnaed iti Brgy. 3, Vigan City.
Naala ni Arellano idiay NSCC office iti sangaribo a pisos, maysa a Samsung cellphone AO1 nga aggatad iti innem a ribo a pisos idinto nga idiay ABOEX Office ket naalana iti kuarta a P20,000 ken maysa a Samsung A12 nga aggatad iti P9,000.
Segun ken ni Catalan, idi pay laeng menor de edad ti nasao a suspek ket adun ti naaramidanna iti maikaniwas kas maibasar ti monitoringda.
Nupay kasta, agtultuloy iti imbestigasyon dagiti pannakabagi ti linteg inaig iti nasao a pasamak.
Kabayatanna, inallukoyna ti publiko a nu makitada ni Arellano ket insigida da nga ipakaammo iti Police Station para iti pannakaidalanna ti husto a proseso.
