VIGAN CITY – Nakemmeg dagiti lima a nagsusugal iti pusoy idiay Brgy. Pug-os, Sinait babaen iti anti illegal gambling operation nga inwayat dagiti pannakabagi ti linteg.
Nabigbig dagiti tallo a senior citizen a suspek a da David Salcedo, agtawen ti walopulo ket uppat nga agnaed iti Brgy. Magsaysay; Tomas Ines, agtawen ti pitopulo ket maysa, Narding Ines, agtawen ti pitopulo idinto a dagiti nakalibas ket da Jemo Ancheta, Lawrence Eugenio Ancheta nga agpapada nga agnaed iti Brgy. Pug-os.
Iti pannaki-uman ti Bombo Radyo Vigan ken ni Pol. Lt. Joel Idica, masansan nga adda agsusugal iti nasao a lugar ket idi nangiwayatda iti operasyon ket nakemmegda dagiti suspek a naaktuan iti iligal nga aramidda ngem dagiti dua ket insigida a naglibas idi sumungad ti grupoda.
Naala kadagiti suspek ti pusta nga aggatad iti duaribo pito a pulo a pisos ken maysa a set ti baraha ket nupay kasta, naipanen iti Sinait Police Station dagiti nagsusugal tapno sangwenda ti kaso a panaglabsing iti Presidential Decree 1602 wenno Anti Illegal Gambling Act.
