VIGAN CITY – Kaso a panaglabsing ti Presidential Decree 1602 ti sangwen dagiti nagsusugal iti cara y cruz idiay Brgy. San Nicolas, Candon City.
Nabigbig dagiti suspek a da Patricio Mina, agtawen ti duapulo; Adonis Galicia, agtawen ti sangapulo ket walo; Jeric Sotelo, agtawen ti duapulo ket tallo; Mark Lino Gacusan, agtawen ti tallopulo ket innem nga agpapada nga agnaed iti nasao a lugar.
Naaktuanda nga agsusugal iti likudan a paset ti oval iti Candon South Central School ket idi adda dagiti pannakabagi ti linteg a mangkemmeg kadakuada, naglibas dagiti dua a kaduada a da King Christian Gadong ken ni Arjay Kenneth Ponsoy a sapsapulen tattan dagiti pannakabagi ti linteg.
Naala kadakuada ti duagasut pitopulo ket maysa a pisos, maysa a cellphone ken naipandan iti Candon City Police Station tapno dumalanda iti usto a proseso.
