VIGAN CITY – Lima iti nakemmeg idinto a maysa iti nakalibas iti naisayangkat nga anti-illegal gambling operation idiay Brgy. Cabaritan, Sto. Domingo.
Dagiti naglabsing iti Presidential Decree 1602 a nakemmeg ket da Jezabel Tesorio, agtawen iti tallopulo ket tallo; Morelia Tabuldo, agtawen iti duapulo ket maysa; Mary Ann Tablatin, agtawen iti limapulo ket innem; Marisa Tablatin, agtawen iti limapulo ket siam; ken Cathleen Armero nga agpapada nga agnaed idiay Sitio Carabaoan, Brgy. Cabaritan, Sto. Domingo idinto a ti nakalibas ket ni Jose Tesorio, agtawen iti innem a pulo ket siam.
Iti insayangkat nga anti-illegal gambling operation dagiti pannakabagi ti linteg iti pagtaengan ni Gloria Tesorio iti nasao a barangay ket nagresultaan iti pannakakemmeg dagiti lima a suspek kalpasan a naaktoanda a nagay-ayam iti Lucky 9 ken nakaalaan iti pusta nga aggatad utu P300 idinto a nakalibas ti maysa a suspek kalpasan a nasiputanna ti presensya dagiti otoridad iti nasao a lugar.
Naala kadakuada iti maysa a set ti baraha ken pusta nga aggatad iti P300 idinto a dagiti suspek ket naipan iti Distric Hospital, Magsingal para iti Medical Examination ken naipan iti Sto. Domingo Police Station pakairamananen dagiti naala kadakuada para iti proper disposition.
