VIGAN CITY – Panaglabsing iti Presidential Decree 1602 ti sangwen dagiti senior citizen a nagsusugal idiay Maynganay Sur, Sta. Maria a nakairamanan ti kapitan iti nasao a barangay.
Nabigbig dagiti suspek a da Ernesto Jr Dasalla, agtawen ti innem a pulo ket siam, kapitan iti nasao a barangay; Crispulo Sr Domingo, agtawen ti pitopulo, maysa nga aglaklako ken ni Amante Dosono, agtawen ti pitopulo ket siam, mannalon nga agpapada nga agnaed iti nasao a lugar.
Segun ken ni PCapt. Regin Cabico, hepe ti Sta. Maria Municipal Police Station, naaktuan nga agaayam iti tong-its dagiti suspek babaen iti inwayatda nga anti-illegal gambling operation ken kunana nga idi kallabes ket adda pay ti nakemmegda a maysa a dati a sangguniang bayan member.
Naala kadakuda ti sangagasut siam a pulo ket lima a pisos ken naipanda idiay Ilocos Sur District Hospital – Narvacan para iti physical examination sakbay a naipaimadan kadagiti pannakabagi ti linteg tapno sangwenda ti kaso a maipila kadakuada.
