VIGAN CITY – Uppat a lallaki iti nakemmeg gapu iti panagsusugalda idiay Brgy. Poblacion West, San Ildefonso.
Segun ti San Ildefonso Municipal Police Station, dagiti suspek ket da Marlon Sibucao Ped, agtawen iti tallopulo ket walo; Ruben Tabangin Tadios, agtawen iti uppat a pulo ket dua, naasawaan nga agpada a construction worker nga agnaed idiay Nambaran, Sto. Domingo; Arthur Viernes Pula, agtawen iti limapulo ket innem, construction worker nga agnaed idiay Poblacion, Sta. Catalina; ken Erwin Pajo Pastor, agtawen iti uppat a pulo ket uppat nga agnaed idiay San Isidro, Bantay.
Insayangkat dagiti pannakabagi ti linteg ti anti-illegal gambling operation iti nasao a barangay a nagresultaan iti pannakakemmeg dagiti suspek a naaktoan ti panagay-ayamda iti pusoy.
Naala kadakuada ti maysa a plywood a lamisaan, dua a monobloc a tugaw, maysa a set ti baraha ken pusta nga aggatad iti P230.
