VIGAN CITY – Maysa iti nagsagaba iti minor injury kalpasan ti panagsinnagid ti tricycle ken patrol ti PNP Vigan idiay Bonifacio St. Corner Gomez St. Brgy. IV, Vigan City.
Segun ti Vigan City Police Station, dagiti karaman iti insidente ket da Patrolman Jeremie Baltazar Cabico, agtawen iti duapulo ket siam, baro, PNP member a na-assign iti Vigan City Police Station nga agnaed idiay Brgy. Sucoc, Narvacan a driver iti Toyota Hilux patrol vehicle iti Vigan PNP; idinto a ti nagmaneho iti tricycle ket ni Roderick Marzan Piga, agtawen iti uppat a pulo ket maysa, naasawaan nga agnaed idiay Brgy. Balaleng, Bantay kaduana dagiti pasaherona a da Hortillano Cabico Cabatu, agtawen iti innem a pulo ket walo; Lolita Malate Cabatu nga agtawen iti innem a pulo ket pito; ken ni Christine Cabatu Cabudol, agtawen ti tallopulo ket uppat nga agpapada nga agnaed idiay Brgy. Mapisi, Nagbukel.
Maibasar iti pakpaka-una nga imbestigasyon, agpapalaud a direksyon iti patrol ti PNP idiay Bonifacio St. idinto a ti tricycle ket agpapaamianan a direksyon idiay Gomez St. idin saan a natansya ti driver ti tricycle iti distansyana ken saan a nagsardeng a gappuanan iti pannakasagidna iti akin-kannawan a paset ti sango iti patrol.
Gapu ti dayta, nakuppil, naikkat ti bumper ken nadadael ti headlight iti patrol ti PNP idinto a ti tricycle ket naapektaran ti akin-kannigid a pasetna.
Nagsagaba iti minor injury iti akin-kannigid a saka ti pasahero ti tricycle a ni Hortillano Cabatu ngem insigida a naisayangkat ti first aid babaen ti nagresponde a CDRRMO personnel ken naipan iti Ilocos Sur Provincial Hospital Gabriela Silang para iti pannakatamingna idinto a saan a naan-ano dagiti dadduma a karaman iti insidente.
