VIGAN CITY – Makikamkammayet ti Candon City Police Station kadagiti kabangibang a police stations iti probinsia para ti naal-alisto a pannakabigbigda no siasino dagiti suspek iti nagsaruno a panagtakawan iti siudad.
Segun ken ni PLt.Col. Ariel Celino, mabalin a maymaysa a grupo ti akin-aramid kadagiti panagtakawan iti maysa nga apartment idiay San Barangay San Jose ken idiay Aloha Nui Hotel, Barangay Paras, Candon City.
Immuna a natakawan ni Mark Christian Buquing de Guia, agtawen iti duapulo ket pito nga agkaskasera iti nasao nga apartment idiay Barangay San Jose.
Natakaw ti cellphone na nga aggatad iti PHP40K, singsing nga aggatad iti PHP8K, 950 Hongkong dollars, ken PHP11,500.
Nasurok kumurang met a PHP250K a gatad ti sanikua ti natakaw kadagiti sangsangaili idiay Aloha Nui Hotel, Barangay Paras, Candon City a dagiti biktima ket da Magdalena Abellera, agtawen iti innem a pulo ket uppat, Regional Director for Population Commission iti CAR, a taga-San Felipe, Binalonan, Pangasinan; Job David Manalang, agtawen iti tallopulo ket lima, technical section head iti POPCOM CAR, a taga-San Carlos Hts, Baguio City, Benguet; ken ni Elmer De Guzman, agtawen iti limapulo ket dua, administrative Aid 6 POPCOM CAR, a taga-Barangay Asin Road, Baguio City, Benguet.
Nupay kasta, nagballaag ni Celino kadagiti kailianna nga agridam a kanayon ket irikepda dagiti balayda no awan ti tao.
