VIGAN CITY – Maisagsaganan ti kaso a maipala kontra ti maysa a lalaki a nagikot ti paltog ta naglabsing iti Republic Act 10591idiay Brgy. Poblacion, San Esteban.
Iti pannaki-uman ti Bombo Radyo Vigan ken ni PLt. Arnold Calzado iti San Esteban Police Station, naidanon kadakuada iti panagprubokar ken panagikot iti illegal a paltog ni Paul Micheal Escudero, agtawen ti tallopulo ket pito, baro, mekaniko nga agnaed iti nasao a lugar isu a nagrespondeda.
Segun ken ni Calzado, pinasingkedan ti suspek nga inaramatna laeng ti paltog a pamutbuteng iti kariri ti amana nga isu ti kasinsinna ta makitanan a madehado bayat iti panagsinsinnungbatda ngem awan iti planona a mangdangran.
Boluntaryo nga insuko ni Escudero iti maysa a unit iti Four Shooter cal. 22 homemade revolver nga awan iti balana kadagiti pannakabagi ti linteg.
