VIGAN CITY – Kaso a malicious mischief ken alarm and scandal iti sangsangwen ni Michael Lagundino Mendez nga agtawen iti dua pulo ket walo, baro, ken awanan iti pagsapulan gapu iti panangprobokar ken panangbansag na kadagiti pagtaengan dagiti biktima a da Leticia Gracia Fajardo nga agtawen iti uppat a pulo ket walo kenni Lyn Lucero Layco nga agtawen iti lima pulo ket dua idiay Barangay Ranget, Tagudin.
Ti suspek ket adda manen kaso na idi nga acts of lasciviousness ngem nakapagpiyansa iti sangapulo ket dua ribo a pisos.
Segun ken ni Police Captain Omar David, hepe ti Tagudin municipal police station, manipud idi nagawid idiay Barangay Ranget ti suspek a naggapu idiay Manila, mamin-adun a daras a rinespondean da.
Gapu iti dayta, kiniddaw ni David iti ina ti suspek a nu mabalin ket saan na pay laeng a piyansaan tapnu agtalinaed iti pagbaludan ta agnakem.
