VIGAN CITY – Pimmusayen ti nagmaneho ti traysikel a natukbob dagiti nangsaruno a lugan kenkuana a napasamak idiay Brgy. Bulag, Bantay idi kalman September 2, 2021 iti oras ti alas sais trentay singko iti bigat.
Ti nagmaneho ti traysikel ket nabigbig a ni Rodel Rafin, agtawen ti uppat a pulo ket uppat, naasawaan nga agnaed idiay Lingsat, Bantay idinto dagiti karaman pay iti insidente ket da Ernie Encarnacion, agtawen ti duapulo ket uppat, baro, taga-Nanerman Sto. Domingo a nagmaneho iti Mitsubishi Canter, ken ni Limmuel Bisenio, agtawen ti duapulo ket walo, baro, taga-Caraisan, Magsingal a nagmaneho iti Isuzu Elf Closed van.
Maibasar iti inisyal nga imbestigasyon, agpapada nga agturong iti daya a direksyon dagiti tallo a lugan nga umuna iti nakatraysikel, akin-tingnga ti mitsubishi canter ken maudi ti closed van.
Immuna a natukbob ti closed van ti adda ti sangona a Mitsubishi canter a gappuanan iti pannakatukbob ti akin-tingnga ti traysikel.
Gapu ti dunor a sinagaba ni Rafin ket naipan iti Metro Vigan Cooperative Hospital ngem pimmusay idinto a saan a naan-ano dagiti dua pay a driver.
