Nadundunor ti nagmaneho iti traysikel ta aksidente a nadungpar ti bus itay 11:43AM iti national highway idiay Barangay Balaleng, Bantay, Ilocos Sur.
Ti nagmaneho ti traysiklel ket ni Rodrigo Barey Cabaong Sr., agtawen iti pitopulo ket tallo, naasawaan, holder ti Driver’s Licence nga agnaed idiay Barangay Puspus, Bantay idinto a ti nagmaneho ti Partas bus ket ni Mac Arthur Mateo Fieldad, agtawen iti limapulo ket uppat, naasawaan, holder iti driver’s license nga agnaed idiay Barangay San Julian Sur, Vigan City.
Iti pannaki-uman ti Bombo Radyo Vigan ken ni PMaj. Pol Areola a hepe ti Bantay Municipal Police Station, agpada nga agpapa-amianan a direksyon dagiti dua a lugan a ti akin-sango ket ti traysikel nga adda iti outer lane iti kalsada.
Segun ken ni Areola, idi nadanonda iti nasao a lugar ket naginnayad a nagsikko iti kannigid ti traysikel ngem aksidente a nadungpar iti bus uray impadas ti driver a liniklikan.
Gapu dayta, nadundunor iti nadumaduma a paset ti bagi ti nagmaneho iti tarysikel ket babaen kadagiti personel ti Municipal Disaster Risk Reduction and Management Office ket naipan iti ospital para iti pannakatamingna idinto a saan a naan-ano ti driver ti bus ken pasaherona.
Nagsaritan dagiti dua a driver ngem manamnama iti panagpatangdanto pay inton makaruar iti ospital ti nagmaneho ti traysikel.
VIDEO – PMAJ. POL AREOLA
