Dead on arrival iti ospital ti nagmaneho iti motorsiklo gapu iti pannakaidungparna iti bus iti national highway idiay Barangay Magsaysay District, Santa, Ilocos Sur.
Ti nagmaneho ti Yamaha NMax 155 ket agtawen iti limapulo ket innem, nagaramat iti helmet, addaan ti driver’s license nga agnaed idiay Sitio Gitna, Novaliches, Quezon City.
Ti met nagmaneho iti Florida Bus ket agtawen iti duapulo ket pito, addaan ti driver’s license nga agnaed idiay Barangay Bangan, Sanchez Mira, Cagayan.
Sakbay iti aksidente ket agturong iti bagatan a direksyon ti motorsiklo idinto a ti bus ket aggapu iti bangir a direksyon nga agturong iti amianan.
Idi nadanonda iti nasao a lugar kangrunaan iti sharp curve iti kalsada ket immagaw ti bus iti linya iti motorsiklo a gappuanan iti pannakadungparna iti nakamotor.
Gapu dayta ket nagsagaba ti fatal injuries iti nagmaneho ti motorsiklo isu a naipan iti Ilocos Sur District Hospital – Narvacan ngem naideklarar a dead on arrival babaen ti attending physician-na idinto a ti driver ken pasahero ti bus ket saan a naan-ano.
