VIGAN CITY – Dead on Arrival ti nagmaneho iti motorsiklo gapu iti pannakaidungparna iti bus iti national highway idiay Brgy. Guimod Sur, San Juan, Ilocos Sur itay alas dos singkwenta iti parbangon.
Segun ti San Juan Municipal Police Station, ti nagmaneho ti nalabbaga a Honda click a motorcycle ket ni Lexter Jimenez Villa, agtawen ti duapulo ket tallo, naasawaan, Jollibee Crew nga agnaed idiay Brgy. Guimod Norte, San Juan idinto a ti driver ti Cabacungan Trans a kolor green ken puraw ket ni Wilmar Salvador Andres, agtawen iti uppat a pulo ket innem, naasawaan, agnaed idiay Sinaoangan, San Agustin, Isabela.
Iti inisyal nga imbestigasyon, agpapabagatan a direksyon ti driver ti bus idin nadanonna iti nasao a lugar ket immagaw ti linya ti nakamotorsiklo nga agturong iti amianan a direksyon a gappuanan ti panagdinnungparda.
Nagsagaba ti fatal injuries ni Villa a nakamotorsiklo gapu ti kapigsa iti impact ti pannakaidungparna isu a naipan iti Pira Hospital, Cabugao ngem naideklarar a natay babaen ti attending physician-na idinto a ti nagmaneho ti bus ken pasaherona ket saan a naan-ano.
Nadadael ti akin-kannawan a paset ken nabittak ti windshield ti bus idinto a nakaru iti nadadael a paset ti motorsiklo kangrunaanen iti sangona.
Iti agdama, agtultuloy iti imbestigasyon ken panagala iti ebidensya tapno maadal a nalaing iti nasao a pasamak.
Kabayatanna, maisagsaganan ti kaso a maipila ti driver ti nasao a bus.
