VIGAN CITY – Kaso a Reckless Imprudence Resulting to Homicide and Damage to Property ti sangwen ti nagmaneho ti Isuzu Elf Palletized truck gapu ti aksidente a pannakadungparna iti naka-electric bike a lalaki iti national highway idiay Barangay Labnig Sur, San Juan itay bigat, oras iti alas nuebe bainte (May 15, 2024).
Ti nagmaneho ti Isuzu Elf Palletized truck ket ni Jake Umbay Ugale, agtawen iti tallopulo ket pito nga agnaed idiay Barangay Manzante, Magsingal idinto a ti nagmaneho ti e-bike ket ni Antonio Delaria Valle, agtawen iti limapulo ket walo, mannalon nga agnaed idiay Barangay Labnig Sur, San Juan.
Iti pannaki-uman ti Bombo Radyo Vigan ken ni PMaj. Benjamin Raquedan manipod San Juan Municipal Police Station, nagballasiw ti naka-electric bike a ni Valle idin saanna a napansin ti sumungad a truck isu a nadungpar.
Segun ken ni Raquedan, inlawlawag ni Ugale a driver ti elf palletized truck nga impadasna a liniklikan ni Valle ngem nadungparna latta.
Gapu ti kapigsa ti impact ket nasurok kumurang lima a metro ti nakaibansagan ti biktima a rason ti pannakadunor iti ulona.
Babaen kadagiti nagresponde a kameng ti Rural Health Unit – San Juan ket naipan iti Pira Hospital idiay Cabugao ni Valle ngem naideklarar a dead on arrival.
Nagpalagip ni Raquedan kadagiti motorista nga agannad ti panagmaneho tapno saan a maisagmak.
VIDEO – PMAJ. BENJAMIN RAQUEDAN
