VIGAN CITY – Nadunor iti nadumaduma a paset ti bagi dagiti nagkalugan iti motorsiklo a naaksidente idiay Brgy. Poblacion Sur, Sta. Maria.
Segun ti Sta. Maria Police Station, ti nagmaneho iti Suzuki Smash 115 motorcycle a color pink ken black ket ni John Harvey Quiabang Garcia, agtawen ti duapulo, baro nga agnaed idiay Barangay. Ambugat, Burgos idinto a ti back rider ket ni Marc Emil Paulo Adriatico Divina, agtawen ti duapulo ket maysa, baro, nga agnaed idiay Brgy. Tinaan, Sta. Maria.
Agturong ti motorsiklo iti Burgos-Sta. Maria Road nga agpaamianan a direksyon idin naawanan ti kontrol iti manibela ti driver ket naigalis iti lugan gapu iti napigsa a tudo isu a naidungpar iti railing iti kalsada.
Gapu ti dunor a sinagaba dagiti dua ket naipanda iti Ilocos Sur District Hospital Narvacan para iti pannakatamingda ket naamoan a positiboda a nakainom idi napasamak iti aksidente.
Kabayatanna, agpada a saan a nagaramat ti helmet dagiti dua idi napasamak iti aksidente.
