Agpada a nadunor dagiti nagkalugan iti motorsiklo kalpasan a nakadinnungparda ti kotse iti Barangay Road idiay Barangay Bannuar, San Juan, Ilocos Sur itay malem, June 21, 2026.
Ti nagmaneho ti Sky Blue Yamaha Aerox ket lalaki nga agtawen iti sangapulo ket walo, nagaramat ti helmet, awanan ti driver’s license, mapapati nga adda iti impluwensya iti arak nga agnaed idiay Barangay Refaro, San Jan; kaduana ti backride-na a babai a menor de edad, nagaramat ti helmet nga agnaed idiay Barangay Barbar, San Juan.
Ti met nagmaneho ti gray Toyota Vios ket lalaki nga agtawen iti innem a pulo ket lima, holder ti professional driver’s license nga agnaed idiay Galvan, Guimba, Nueva Ecija.
Agpapabagatan a direksyon ti motorsiklo idinto nga agpalaud a direksyon ti kotse idin nadanonda iti crossing iti nasao a lugar ket nadungpar ti motorsiklo iti akin-kannawan a paset ti sangwanan ti kotse.
Gapu dayta ket nagasgasan dagiti nagkalugan iti motorsiklo isu a naipanda iti Ilocos Sur District Hospital, Magsingal para iti pannakatamingda idinto a saan a naan-ano ti driver ti kotse.
