Agpada a naipaagas iti ospital dagiti ag-live in partner a naglugan iti motorsiklo kalpasan a naidungparda iti maysa a truck iti national highway idiay Barangay Taleb, Bantay, Ilocos Sur itay alas dies kuarenta iti bigat, July 3, 2025.
Iti pannaki-uman ti Bombo Radyo Vigan ken ni PCapt. Donaldson Pagalanan a Chief of Police iti Bantay Municipal Police Station, ti nagmaneho iti puraw a Kawasaki Fury motorcycle ket lalaki nga agtawen iti pitopulo ket lima ken ti back ride-na a live-in partner na nga agtawen iti limapulo ket walo nga agpada nga agnaed idiay Barangay Basug, Santa ken agpada a nakasuot iti helmet idinto a ti nagmaneho iti puraw a HOWO Sinotruck ket lalaki nga agtawen iti limapulo ket uppat nga agnaed idiay Barangay Bulag, Bantay.
Segun ken ni Pagalanan, agpapadaya a direksyon ti truck idin nagsardeng iti nasao a paset iti national highway ket idi nawayan isun ti panagsikkona iti kannigid a sumrek iti diversion road ngem kellaat a dimteng iti napaspas a patarayna a motorsiklo a gappuanan ti pannakatama iti akin-kannigid a pilid iti likod ken grill iti truck.
Agpada a nadunor iti nadumaduma a paset iti bagi dagiti nagkalugan iti motorsiklo isu a naipanda iti Ilocos Sur Provincial Hospital – Gabriela Silang para iti pannakatamingda idinto a saan a naan-ano ti driver ti truck.
Naammoan a minor injury ti sinagaba ti drayber ti motorsiklo ngem nai-admit iti ospital idinto a ti live-in partner na ket na-fracture ti paragpagna a gappuanan iti agtultuloy a pannakamonitorna.
Nakapagsaritan dagiti karaman iti aksidente ket sisasagana a tumulong ti driver ti truck para ti magastos dagiti dua.
Kabayatanna, nagpalagip manen ni Pagalanan kadagiti motorista iti panagbalin a displinado ken annad a panagmaneho tapno maliklikan iti aniaman nga aksidente.
