Nadunor ti driver ti motorsiklo ken backride-na ta nadungparda iti bimmallasiw nga aso idiay Brgy. Mayngay Norte, Sta. Maria, Ilocos Sur.
Ti Suzuki ket minaneho ni Mark Vincent Castro Carrido, agtawen iti sangapulo ket walo, estudiante ken ti backride-na a ni John Carlo Carrido, agtawen iti sangapulo ket siam ken agpada a residente idiay Brgy. Nanguneg, Narvacan.
Iti pannaki-uman ti Bombo Radyo Vigan ken ni PLt. Jenson Refuerzo, Deputy Chief of Police manipod Sta. Maria Municipal Police Station, agpapaabagatan a direksyon ti motorsiklo idin kellaat a bimmallasiw ti aso nga adda kawarna manipod laud a paset iti kalsada isu a nadungpar ket naawanan ti kontrol ti manibela ti nakamotorsiklo.
Nadunor iti nadumaduma a paset ti bagi ti drayber ken backride isu nga insigida a naipan idiay Ilocos Sur District Hospital – Narvacan para iti pannakatamingda idinto a ti nadungpar nga aso ket natay.
Naammoan a positibo ti resulta iti alcoholic breath test dagiti dua a naglugan iti motorsiklo.
Manarimaan ti imbestigasyon dagiti otoridad iti pasamak ket iti agdama, awan pay ti immamin no siasinno iti akin-kukua iti aso.
-Nesami Ryce Dela Cruz
