VIGAN CITY – Nadundunor dagiti nagkalubbon iti motorsiklo gapu iti aksidente a pananangtukbobda ti maysa a kurong-kurong iti national highway Brgy. Dardarat, Tagudin.
Segun ti Tagudin Municipal Police Station, ti nagmaneho ti Euro Black 175 a kurong-kurong ket ni Karen de Guzman Lucero, agtawen iti duapulo ket pito, agtagilako nga agnaed iti nasao a lugar idinto a ti nagkalubbon iti black skygo 150 a motorsiklo ket nabigbig ti driver a ni Jisrael Hababa, agtawen iti duapulo ket innem, helper idinto a ti kinalubbonna ket ni Jayson Hababa Luancin, agtawen iti tallopulo ket dua, helper nga agpada nga agnaed met la ti nasao a lugar.
Agpada nga agpapabagatan a direksyon dagiti dua a lugan idi naawanan ti kontrol ti manibela iti akin-likod a lugan nga isu dagiti nagmotorsiklo ket natukbobda ti nakakurong-kurong.
Gapu ti pasamak ket nadundunor dagiti nagkalubbon a naipan iti Ilocos Sur District Hospital Brgy. Bio, Tagudin para iti pannakatamingna.
Naamoan a dagiti nagkalubbon ket adda iti impluwensyana iti arak idi napasamak iti aksidente ken saanda pay a nagaramat iti helmet.
Kabayatanna, saan a naan-ano ti driver ti kurong-kurong idinto a dagiti lugan ket naipan iti Tagudin Police Station para iti documentation ken proper disposition.
