VIGAN CITY – Dua a nagkalubbon ti motorsiklo ti naipurwak iti kataltalonan bayat ti panagsalogda iti agkurba a paset ti kalsada idiay Sitio Urzadan, Barangay Cayus, Quirino.
Segun ti Quirino Municipal Police Station, nabigbig ti nagmaneho iti nangisit a Yamaha Mio a ni Jay-R Dagyam Palla, agtawen ti duapulo, baro, laborer idinto a ti kinalubbonna ket ni Zytel Amon Balliaga, agtawen ti duapulo ket dua, baro nga agpada nga agnaed iti nasao a lugar.
Maibasar iti inisyal nga imbestigasyon, agpapaamianan a direksyon iti motorsiklo a naggapu idiay skyline Quirino idin agsalog iti agkurba a paset iti kalsada ket naawanan ti preno a gappuanan ti pannakapukawna iti kontrol ti manibela ket naidungpar ti motorsiklo iti barikada ken naibansag dagiti nagkalubbon iti taltalon.
Nagasgasan dagiti dua iti nadumaduma a paset ti bagida idinto a saan pay nga ammo nu mano ti gatad iti naapektaran ti naidungpar a lugan.
