VIGAN CITY – Natalgeden ti kasasaad dagiti nagkalubbon iti motorsiklo a naidungpar iti agbwelbwelta a trailer tractor idiay Brgy Sinabaan, Bantay
Iti pannaki-uman ti Bombo Radyo Vigan ken ni PMaj. Juan Jhayar Maggay, naggapu iti laud a paset ti kalsada ti trailer tractor a minaneho ni Freddie Torreno Jr, agtawen ti tallopulo ket uppat, baro nga agnaed idiay Brgy. Tay-ac, Bantay a sumrek koma iti highway isu a dagiti dadduma a lugan ket nagsardeng ta adda met ti taga-senyas ngem napaspas ti motorsiklo a minaneho ni Micheal Pugal, agtawen ti tallopulo ket uppat, naasawaan, mannalon nga agnaed idiay Capangdanan, Bantay kaduana ni Rex Llanes, agtawen ti duapulo ket uppat, baro, construction worker nga agnaed iti Brgy. Ora East, Bantay idi naidungpar iti trailer tractor.
Innayon ti hepe a nakainom ti arak dagiti agkalubbon ti motorsiklo ket basar iti CCTV nakasardengen amin a lugan gapo iti panagbwelta ti trailer ngem napaspas unay ti panagpataray ti driver a rason iti aksidente.
Naipaagas dagiti nagkalubbon iti ospital nga itan ket agpapalaingen idinto a ti drayber ti trailer tractor ken ti pahinantena ket saan a nadangran.
