VIGAN CITY – Nadunor dagiti dua a nagkalubbon iti motorsiklo ta naidungparda iti nakaparking a 14-wheeler iti national highway idiay Brgy. Calaoa-an, Candon City.
Segun ti Candon City Police Station, dagiti karaman iti insidente ket ti Yamaha mio 125i motorcycle a minaneho ni Jennelyn de Guzman Pedro, agtawen ti sangapulo ket siam, balasang, estudyante a taga-Brgy. Bagani Campo, Candon City kaduana ti backriderna a ni John Mark Haduca, agtawen ti duapulo, baro, laborer nga agnaed idiay Brgy. Gabor Norte, Sta. Cruz.
Sakbay iti pasamak ket agturong ti bagatan a direksyon ti motorsiklo idin nadanonda iti nasao a lugar ket naidungparda iti akin-kannigid a paset iti nakaparking a 14-wheeler iti daya a paset iti kalsada.
Gapu ti pannakaidungoarda ket nagsagaba iti dunor iti ulo ken nadumaduma a paset ti driver idinto a ti kinalubbonna ket nadunor iti bagina ken naapektaran ti akin-kannawan a takyagna.
Agpada dagiti nagkalubbon ti motor a saan a nagaramat iti helmet idi napasamak ti aksidente ken inaminda pay a nakainomda iti nasanger.
Nupay kasta ket naipan dagiti dua iti Candon City Hospital.
