Nadunor dagiti nagkalubbon iti motorsiklo gapu iti napasamak nga aksidente iti national highway ti Barangay Resurrecion, San Juan, Ilocos Sur a nakairamanan ti maysa a bus ken motorsiklo.
Nabigbig ti drayber ti Euro 150 motorcycle a ni Jay Domino Valdez Robillon, agtawen iti duapulo ket innem, taga-Barangay Saoang, San Juan, backride-na ni John Paul Saludo, taga-Barangay Pandayan iti nasao nga ili.
Ti met nagmaneho iti bus ket ni Gerald Ullero Lucson, agtawen iti tallopulo ket walo, taga-Barangay Bacar, Magsingal.
Basar iti CCTV footage, agpapalaud ti motorsiklo a naggapu iti Luna Street a mapan iti national highway idin ta nadungparna ti akin-kannawan a likudan a paset ti agpapa-amianan a bus.
Gapu dayta, nagsagaba iti head injury ti drayber ti motorsiklo idinto a minor injuries ti sinagaba ti kinalubbonna.
Saan met a naan-ano ti drayber ti bus ken dagiti pasaherona.
Natakuatan a dagiti nagkalubbon ket nakainom idi mapasamak ti inisdente.
