Nagsagaba iti minor injuries dagiti nagkalubbon iti motorsiklo a nabiktima iti hit and run iti national highway idiay Barangay Imus, Santiago, Ilocos Sur.
Ti drayber ti motorsiklo a Suzuki Raider ket ni Ryan Figuracion Wigan, agtawen iti duapulo ket pito, taga-Barangay Maligcong, Santiago, kinalubbonna ni Charito Pilayan Bao-Ilan, agtawen iti duapulo ket innem, LGU employee a taga-Barangay Dinaratan, Santiago.
Iti pannaki-uman ti Bombo Radyo Vigan ken ni PLT Jaime Caban, Deputy Chief of Police ti Santiago Police Station, agpapa-abagatan ti motorsiklo nga adda iti outer lane idi nasagid ti saan pay a nabigbig a lugan a napaspas ti patarayna.
Naipaagas iti ospital dagiti nagkalubbon para iti naan-anay a pannakatamingda.
Agtultuloy ti imbestigasyon ti Santiago Police Station inaig ti napasamak ken iberipikada iti Highway Patrol Group ken Land Transportation Office ti plaka ti lugan a nakita babaen kadagiti witness tapno maamuan no sino ti drayber a pilaanda iti kaso.
