VIGAN CITY – Natay ti maysa a senior citizen a lalaki a nagmaneho ti motorsiklo ta naidungpar iti maysa nga elf truck idiay Brgy. Sabangan, Santiago, Ilocos Sur.
Iti pannaki-uman ti Bombo Radyo Vigan ken ni PLt. Godofredo Ribuyaco a mangidaulo ti Santiago Municipal Police Station, mapapati a nagsingir ti pautang ti biktima a ni Romeo Gacusan, agtawen ti pito pulo nga awanan ti DL nga agnaed idiay Brgy. Balingaoan, Candon City ken napaspas ti panagpatarayna idi napasamak ti insidente.
Nabigbig met ti nagmaneho ti Elf truck a ni Kristian Bumata, agtawen ti duapulo ket lima, naasawaan nga agnaed idiay Brgy. Bulbulala iti nasao nga ili.
Segun ken ni Ribuyaco, agpapa-amianan a direksyon ti ni Gacusan iti provincial road, Brgy, Sabangan iti nasao nga ili idin immagaw ti sabali a linya gappuanan ti panagdinnungparda ti sumungad nga elf truck.
Nadunor ti nadumaduma a paset ti bagi ni Gacusan a naipan idiay Candon General Hospital para ti pannakatamingna ngem naipakaamo a natay idinto a saan a naan-ano ti nagmaneho ti truck.
Nupay kasta ket addan ti inisyal a nagsaritaan ti driver ti elf truck ken pamilia ti biktima.
