VIGAN CITY – Dead on arrival ti maysa a senior citizen a nagballasiw ta dinungpar iti nakamotorsiklo iti national highway idiay Brgy. Gabur Sur, Sta. Cruz, Ilocos Sur.
Segun ti Sta. Cruz Municipal Police Station, ti nagmaneho ti nangisit a Honda TMX motorcycle ket ni Rolando Pangilinan Laungayan, agtawen ti uppat a pulo, naasawaan nga agnaed idiay Brgy. Abuor, Narvacan idinto a ti nagballasiw a senior citizen ket nabigbig a ni Corazon Fajarillo Villanueva, agtawen ti pitopulo ket maysa, naasawaan nga agnaed idiay Brgy. Gabur Sur, Sta. Cruz.
Iti panagresponde dagiti pannakabagi ti linteg ket nakitada laengen a nakasardeng ti motorsiklo iti amianan a paset ti kalsada ken mano a metro iti kaadayona iti nakaidda a nagballasiw iti daya a paset ti kalsada nga adda dunorna.
Iti imbestigasyon, agpapaamianan a direksyon ti motorsiklo idi bimmallasiw ti bikima manipod laud nga agturong iti daya a paset iti kalsada idi nadungpar.
Nagsagaba iti dunor iti ulo ken akin-kannawan a luppo ti biktima a gappuanan ti pannakaipanna iti Ilocos Sur District Hospital para ti pannakatamingna ngem naideklarar a dead on arrival babaen ken ni Dr. Johanna Tipallo.
