VIGAN CITY – Dead on the spot ti maysa a senior citizen a lalaki gapu iti pannakadungparna bayat ti panagballasiwna iti national highway idiay Brgy. Mabilbila Sur, Santa.
Segun ti Santa Municipal Police Station, ti pedestrian ket agtawen iti pitopulo ket tallo nga agnaed iti nasao a lugar idinto a ti nagmaneho iti motorsiklo ket agtawen iti tallopulo a lalaki nga agnaed idiay Brgy. Magsaysay District, Santa.
Sakbay iti insidente, nagballasiw ti senior citizen iti highway manipod laud nga agpadaya a direksyon idi dimteng ti nakamotorsiklo nga agpabagatan a direksyon ket aksidente a nadungparna ti senior citizen.
Nagsagaba iti head injury ti biktima a gappuanan ti insigida a pannakatayna kas indeklarar ti attending physician-na a ni Dr. Marilou Cardenas iti Santa MHO idinto a ti driver ti motorsiklo ket nagsagaba iti dunor a naipan iti Metro Vigan Cooperative Hospital, Bantay para iti pannakatamingna.
