VIGAN CITY – Tallo ti nakemmeg idinto a naglibas ti dua pay a lalaki gapu ti panagay-ayamda iti billiard poker idiay Brgy. Apatot, San Esteban.
Nabigbig dagiti suspek a da Jovito Gamason Feliciano, agtawen ti tallopulo ket innem, naasawaan, helper ken owner; Ricky Ea Vergara, agtawen ti tallopulo ket lima, baro, mangngalap; Jeffrey Medina; Jaycer Macatbag ken maysa a menor de edad nga agtawen ti sangapulo ket pito nga agpapada nga agnaed iti nasao a lugar.
Segun ti San Esteban Police Station, nakaawatda iti report inaig iti manarimaan nga illegal gambling iti nasao a lugar isu a nagresponde dagiti pannakabagi ti linteg ket naaktuanda dagiti suspek nga agayay-ayam ti billiards ngem naglibas da Jeffrey Medina ken Jaycer Macatbag.
Naala kadagiti suspek ti maysa a Billiard Table, dua a billiard stick, sangapulo ket innem a piraso iti billiard balls, tallopulo ket pito a piraso ti playing cards ken pusta nga aggatad iti walopulo a pisos.
Addan ti kustodiya dagiti pannakabagi ti linteg dagiti suspek pakairamanan ti naala kadakuada.
