VIGAN CITY- Manarimaan pay laeng ti restructuring ti National Food Authority (NFA) maibasar iti nabatbati kadakuada a responsibilidad gapu ti pannakaipatungpal ti rice tarrification law.
Ti eksklusibo a pannaki-uman ti Bombo Radyo Vigan ken ni NFA- OIC Administrator Tomas Escares, uray nu adu dagiti empleyado da a maapektaran gapu ta buffer stocking laengen iti nabatbati kadakuada nga akem da iti panangimanehar iti suplay ti bagas ditoy pagilian ket nakasagana latta ti NFA nga agserbi iti publiko, nangruna kadagiti mannalon.
Kinunana, agingga nga adda ti kwarta nga igatang da iti produkto dagiti local a mannalon ket agtultuloy iti panaggatang da ta silulukat pay laeng dagiti amin a bodega para kadakuada.
Kagiddan iti pannakaipatungpal ti rice tarrification law ket naikkaten ti regulatory powers ti NFA iti panagangkat iti bagas a kayat na a sawen ket nawayan iti siasinuman nga agangkat ken aglako ti bagas ta saanen nga aglisensya ti NFA kadagiti retailers, whole-salers ken kadagiti amin nga adda pakainaigan na ti rice and grains industry iti pagilian.
Inpaganetget ti opisyal a mabalin a masukatan iti nagan ti NFA ngem saan a mabalin a marakrak ti sibubukel nga ahensya ta amin a pagilian ket masapul nga adda ti ahensya a mangimanehar iti food security para kadagiti tattao.
