Dumalan ti dua agingga tallo a bulan a rehabilitation ti Belgian Malinois K9 ni Kobe sakbay a maideploy manen kas pinasingkedan ti animal welfare non-governmental organization (NGO) nga Animal Kingdom Foundation (AKF).
Segun ti AKF, ti addang ket nagtulaganda iti Regional Explosive and Canine Unit – NCR (RECU-NCR).
Maipalagip a nag-viral ti ladawan ti police service dog idi nai-deploy iti nakapasamakan ti panagbettak iti paset idiay Tondo, Manila idi August 3.
Adda dagiti netizen a nagdanag gapu iti mapapati a nakuttong a langan ti aso ngem impaganetget ti RECU-NCR a physically fit ti aso.
Inlawlawag ti AKF a normal iti lab result ti aso, husto iti panagbakunana ken mangmangan a nasayaat, kasta payen a manamnama a kompletoenna ti refresher training.
