Vigan City – Panaglabsing iti Presidential Decree 1602 iti sanguen dagiti nag-billiard idiay Barangay Sapang, Galimuyod idi kalman.
Nabigbig dagiti suspek a da Edsob Galleso, agtawen ti uppat a pulo ket maysa, naasawaan nga agnaed idiay Brgy. Allangigan 2nd, Candon City ken Ryan Iblogan, agtawen ti dua pulo ket tallo, awanan trabaho nga agnaed idiay Brgy. Daldagan, Galimuyod.
Babaen iti panagtitinulong iti Galimuyod Police Station, 103rd Mobile Coy ken RMFB1 ket nangisayangkatda iti anti-illegal gambling operation a nakakemmegan dagiti nasao a suspek idinto a nakalibas ti maysa pay a kaduada a ni Norman Clyde Gaboy nga agnaed iti Barangay Allangigan 2nd, Candon City.
Naala kadakuada iti maysa a lamisaan iti billiard, maysa a set iti billiard ball, dua a pidaso cue stick, maysa a triangle rack, dua a pidaso a chalk, maysa a bridge cue ken pusta a walo gasut ket sangapulo a pisos nga addaan iti kustodiya dagiti pannakabagi iti linteg pakairamanan dagiti suspek.
